მოთქმა ხმითა თავ-ბოლო ერთი
ვაი, რა კარგი და საჩინო რა ცუდად მიგიჩნიეს! ბოროტისაგან კეთილი შურით ვერ გაარჩიეს, მაცხოვნებელი შენ მათი დამღუპველად მიგიჩნიეს, დიდება შენს მოთმინებას, უფალო იესო!
ვაი, რა კარგი და საჩინო რა ცუდად მიგიჩნიეს! ღვთის საიდუმლო გატეხეს, გულში ვერ დაგიტიეს, ოცდაათ ვერცხლად გაგყიდეს, ისიც კი დაანაწილეს, დიდება შენს მოთმინებას, უფალო იესო!
ვაი, რა კარგი და საჩინო რა ცუდად მიგიჩნიეს! შეგიპყრეს თავისი მხსნელი, საბელი შემოგახვიეს; მაგრად შეგიკრეს ხელები, უფალს არაფერი დაგითმეს, დიდება შენს მოთმინებას, უფალო იესო!
ვაი, რა კარგი და საჩინო რა ცუდად მიგიჩნიეს! ავაზაკზე გაგცვალეს, ბარაბა მათ აირჩიეს; უღირსი სიტყვა შეგკადრეს, გაგლანძღეს, გაგათრიეს, დიდება შენს მოთმინებას, უფალო იესო!
ვაი, რა კარგი და საჩინო რა ცუდად მიგიჩნიეს! ფრჩხილებზე ლერწამი დაგაყარეს, ფრჩხილის ძირები აგატკინეს, ყვრიმალში გცეს თვალებაკრულს, გკითხეს: „ვინ გცემა, თქვი ეს?“ დიდება შენს მოთმინებას, უფალო იესო!
ვაი, რა კარგი და საჩინო რა ცუდად მიგიჩნიეს! ბრალი ვერ გპოვეს, დაგსაჯეს, პილატე მოგისიეს; ბრალეულობის სისხლი თავზე დაიღვარეს შვილებთან ერთად. დიდება შენს მოთმინებას, უფალო იესო!
ვაი, რა კარგი და საჩინო რა ცუდად მიგიჩნიეს! ხელდაბანილებმა შოლტით გცეს, მსხვერპლს სისხლი შეურიეს; ეკლის გვირგვინი დაგადგეს, გოლგოთაზე მიგიწვიეს, დიდება შენს მოთმინებას, უფალო იესო!
ვაი, რა კარგი და საჩინო რა ცუდად მიგიჩნიეს! შესამოსელი გაგხადეს, ქლამინდი შემოგახვიეს! ჯვარზე გაგაკრეს, ხელ-ფეხზე ლურსმანი გაგიყარეს, დიდება შენს მოთმინებას, უფალო იესო!
ვაი, რა კარგი და საჩინო რა ცუდად მიგიჩნიეს! წყალი ითხოვე, მოგართვეს, ძმარში ნაღველი შეურიეს; წმინდა შენს საღმრთო გვერდში ლახვარი ჩაგარტყეს, დიდება შენს მოთმინებას, უფალო იესო!
ვაი, რა კარგი და საჩინო რა ცუდად მიგიჩნიეს! მოგკლეს უბრალო, ამ ბრალით ქვეყანა შეარყიეს; მზე დააბნელეს, მთვარეც, ვარსკვლავები მიმოფანტეს. ტაძრის კრეტსაბმელი გაიპო, ბოლომდე შუაზე გაიხა.
ჯვრიდან ჩამოგხსნეს, შეგახვიეს, ტილოში გაგახვიეს: დაგმარხეს, მკვდარსაც არ გენდვნენ, გარს მცველი შემოგახვიეს. მოიქეცი მათ მიმართ სულგრძელად და დაითმინე ეს ჩვენთვის! დიდება შენს მოთმინებას, უფალო იესო! მოიქეცი მათ მიმართ სულგრძელად და დაითმინე ეს ჩვენთვის! დიდება შენს მოთმინებას, უფალო იესო! დიდება შენს მოთმინებას, უფალო იესო!
ვაი, რა კარგი და საჩინო რა ცუდად მიგიჩნიეს! არ ვიცი, რატომ მოიქცნენ ასე უგუნურებმა, რა ცუდი შეგამჩნიეს? მკვდრებს აცოცხლებდი, კურნავდი კეთროვნებს, წყალმანკიერებს; ბრმებს თვალებს უხელდი, ეშმაკეულებს ათავისუფლებდი.
მუნჯს ენას აძლევდი, ყრუს – სმენას, საპყრებს – ლამაზ სიარულს, მცირე პურს ბევრად, წყალს ღვინოდ აქცევდი – „ჭამეთ, სვით ეს“. ამაზე მეტს არაფერს ეუბნებოდი: „მიენდეთ ზეციერ ღმერთს! მშვიდად იცხოვრეთ, ერთმანეთს ცუდი არაფერი გაუკეთოთ!“
მოიკითხეთ ღარიბები, დაალევინეთ და დააპურეთ მშიერები; რასაც კეთილს გააკეთებთ, ღმერთი თქვენ მოგაგებთ მის სანაცვლოს! ორ სწორ გზას უჩვენებდი: ხორციელ და სულიერ გზას. ამის სანაცვლოდ შენ მათ სიკვდილი შეგამთხვიეს! მოიქეცი მათ მიმართ სულგრძელად და დაითმინე ეს ჩვენთვის, დიდება შენს მოთმინებას, უფალო იესო! მოიქეცი მათ მიმართ სულგრძელად და დაითმინე ეს ჩვენთვის, დიდება შენს მოთმინებას, უფალო იესო! დიდება შენს მოთმინებას, უფალო იესო!