თქვენ იმიტომ ხართ გათამამებულნი, რომ ცილისწამებით გვდებთ ბრალს ურწმუნოებაში, ღმერთის უარყოფაში.
ჩვენს თაობას არასოდეს სწამებია არარაობის ღმერთი, ყალბი ღმერთი. მან უარყო მზაკვრობის, თვალთმაქცობისა და უსაქმურობის ღმერთი.
ხარბი და მძარცველი ღმერთი კი თქვენნაირებს დაუთმო.
ჩვენ გვწამს ღმერთი, რომელიც უსაქმურებს ანადგურებს. ის არის ტვირთმძიმეთა და მაშვრალთა მხსნელი. ის არის ტანჯულთა, ჩაგრულთა და უძლურთა შემწყნარებელი.
ეს ღმერთი ჯვარს ეცვა დედამიწაზე იმ მოძღვრებისთვის, რომელიც ყველას ძმობასა და თანასწორობას ქადაგებს. ის ძლიერებს აბამს და უძლურებს ათავისუფლებს. თქვენნაირი ადამიანებისგან კი გმობილი და დევნილია.
ის არის ორგულობისა და ორპირობის ძირის დამცემი და დამთრგუნველი. ის ამხილებს და დევნის ფარისევლებსა და სადუკეველებს.
განა მან არ შეადარა თქვენნაირი კაცი გარედან მორთულ კუბოს, რომელიც შიგნით სავსეა სიმყრალით?! თქვენ, მზაკვრობით სავსენო და ბოროტად მორწმუნენო, მას მხოლოდ სიტყვით აღიარებთ, საქმით კი არა.